COVID-19 response

If you are looking for the latest legal information relating current Coronavirus laws in New Zealand, check out our new section: Coronavirus and the Law.

Communtity Law Manual | Taonga Māori | Te reo Māori | Te mana o te reo Māori

Te mana o te reo Māori

Ko te reo hei reo ōkawa mō Aotearoa

Te Ture mō Te Reo Māori 2016, wehenga 5

I Aotearoa nei, e wātea ana tātou katoa ki te kōrero i te reo e hiahia nei tātou, engari, kāore pea e taea e ētahi atu tāngata tō reo ake te kōrero i ngā wā katoa me ngā wāhi katoa. Heoi anō, he mana anō tō te reo Māori i raro i te ture.

Hei tā te Ture Reo Māori, ko te reo Māori hei reo ōkawa mō Aotearoa.

I runga anō i taua ōkawatanga, he motika tō ngā tāngata katoa kia kōrero Māori ai i ngā kōti (tirohia te wāhanga e whai ake nei i tēnei upoko, “Tō motika kia kōrero Māori ai i ngā kōti”).

Hāunga i aua motika rā, kāore pea he motika anō e ai ki te ture, hei whakamana i a koe kia kōrero Māori ai i ngā wāhi i waho i te kōti.

Te tūmanako ia, me akiaki e ērā atu tōpūtanga o te karauna, pērā i ngā manatū kāwanatanga, kia whai wāhi ai te reo Māori i aua horopaki, engari he mea kaupapa here tērā, ehara i te mea kua whakamanahia tēnei e te ringa ture.

Te Taura Whiri i te Reo Māori

Te Ture mō Te Reo Māori 2016, wehenga 37, 40

I whakatūria Te Taura Whiri i te Reo Māori i raro i te Ture Reo Māori tuatahi hei whakawhanake, hei ārahi hoki i ngā huarahi tika kia whakamana ai te reo Māori hei reo ōkawa mō Aotearoa. Ko tāna mahi anō he whakatairanga i te reo hei reo ora, hei reo kōrerorero anō hoki. E ai tā Te Ture mō Te Reo Māori 2016, ka haere tonu Te Taura Whiri me āna mahi.

Kei Te Taura Whiri hoki te mana tuku tiwhikete kaiwhakamāori. (Kia kitea ai ngā kōrero e pā ana ki te mahi whakamāori/whakapākehā, tirohia ngā wāhanga e rua e whai ake nei i tēnei upoko, “Tō motika kia kōrero Māori ai i ngā kōti” me “He whakamāori i ngā pepa o te kōti?”).

Te Ture mō Te Reo Māori 2016, wehenga 17–19

Kei raro i te mana o te Ture o 2016, kua whakatūria anō hoki tētahi rōpū motuhake, ko Te Mātāwai. He māngai te rōpū nei mō ngā iwi Māori me ngā tāngata Māori, e pā ana ki ngā rautaki reo Māori. Ko Te Mātāwai tērā e ārahi ana, e whakatairanga ana i te hauora o te reo mō ngā iwi, mō ngā hapori, mō te hunga Māori, ā, ka riro māna e tautoko ngā kaupapa reo Māori o te kāwanatanga.

Kia mōhio ai: Ehara i te mea kua rerekē rawa ngā motika e pā ana ki te reo Māori i raro i te mana o tēnei Ture mō Te Reo Māori 2016. He āhua rite ngā motika ki ērā o te Ture Reo Māori 1987. Engari, kua rerekē ētahi o ngā mahi whakahaere e pā ana ki te whakatairanga me te whakaora i te reo Māori.

back to top
Page Reader Press Enter to Read Page Content Out Loud Press Enter to Pause or Restart Reading Page Content Out Loud Press Enter to Stop Reading Page Content Out Loud Screen Reader Support