He whakamāori i ngā pepa o te kōti
Ka āhei au ki te tono kia whakamāoritia ngā pepa kōti?
District Court Rules 2014, rule 1.16 Family Court Rules 2002, rule 131 High Court Rules 2016, rule 1.12 Criminal Procedure Rules 2012, rule 1.10
I ngā kēhi hiwhiri (ehara i te taihara) i te Kōti Matua, i te Kōti ā-Rohe, i te Kōti ā-Whānau hoki, kei a koe te motika kia tono atu kia whakamāoritia ngā pepa o tērā atu taha o te kēhi, engari me matua hāpono atu koe ki te Kairēhita kāore e taea e koe ngā pepa te pānui i te reo Pākehā. Ki te hiahia koe ki te tono atu ki te Kairēhita kia whakamāoritia ngā pepa, me tuku i tō tono i mua i te 10 rā whai muri i tō whiwhi i ngā pepa. Ki te tonoa te whakamāoritanga e te Kairēhita, ka riro mā tērā atu taha o te kēhi ngā pepa e whakamāori. Kei te kōti anō hoki te mana kia tono atu kia whakamāoritia he pepa, ahakoa kāore anō kia tonoa e koe.
I ngā kēhi taihara, ka āhei koe ki te tono atu kia whakamāoritia ngā pepa o tērā atu taha, ā, he mana tō te āpiha whakahaere, tō te Kairēhita kōti hoki hei tono atu kia whakamāoritia mehemea kua hāpono atu koe kāore e taea e koe ngā pepa te pānui i te reo Pākehā – engari ehara tēnei i te motika, kei te āpiha whakahaere, te Kairēhita rānei te tikanga. E ōrite ana ki ngā kōrero ki runga ake nei, me tuku i tō tono i mua i te 10 rā whai muri i tō whiwhi i ngā pepa. Kei te āpiha whakahaere anō hoki te mana kia tono atu kia whakamāoritia he pepa, ahakoa kāore anō kia tonoa e koe.
